12-Jul-2015
ಎಸ್‌ ಮಂಜುನಾಥ್‌

(ಮಂಜುನಾಥರ ಕವಿತೆ ಕುರಿತಾದ ಒಂದು ಕಿರುಬರಹ ಹಾಗೂ ಅವರು ಬರೆದು ವಾಚಿಸಿದ ಎರಡು ಕವಿತೆಗಳು ಇಲ್ಲಿವೆ)

ಕವಿತೆ!
ಕವಿತೆಯ ಓದುಗರು ಈಗ ಬಹಳ ಕಮ್ಮಿಯಾಗುತ್ತಿದ್ದಾರೆ. ಹಾಗೆ ನೋಡಿದರೆ ಏನನ್ನಾದರೂ ಓದುವವರು ಕಮ್ಮಿಯೇ. ಅದರಲ್ಲೂ ಕವಿತೆಯನ್ನಂತೂ..... ಕವಿತೆಯನ್ನು ಪ್ರಕಟಿಸುವವರು ಬಾಯುಪಚಾರಕ್ಕೆ ಕವಿಗೆ ಒಂದಷ್ಟು ಗೌರವ ಕೊಡುತ್ತಾರೆ. ಅದರೆ ಅವರ ಮಾತಿನ ಮಧ್ಯೆ ಕವಿಗೆ ತಾವೇನೋ ಉಪಕಾರ ಮಾಡುತ್ತಿದ್ದೇವೆ ಎಂಬ ಭಾವನೆ ನುಸುಳಿಬಿಟ್ಟಿರುತ್ತದೆ. ಅವರದು ತಪ್ಪು ಎಂದಲ್ಲ, ಕವಿತೆ ಪ್ರಕಟಿಸಿ ಹಣ ಮಾಡುವ ಸ್ಥಿತಿ ಇಲ್ಲವಾಗಿ ಇದೆಲ್ಲ.

ಓದುವವರಲ್ಲೂ ಹಲವು ಮಂದಿಗೆ ಕವಿತೆಯ ಬಗ್ಗೆ ಫೀಲ್ ಹೊರಟು ಹೋಗಿರುವಂತೆನಿಸುತ್ತದೆ. ಕವಿತೆಯ ಜೀವಂತಿಕೆ, ಅದರ 'ಕಾಮರೂಪಿತನ', ಓದುಗ ಪ್ರತಿಕ್ರಿಯೆ ಇತ್ಯಾದಿ ಮಹತ್ವಪೂರ್ಣ ಚರ್ಚೆ-ಅದು ಬೇರೆ. ಆದರೆ ಕವಿತೆಯಲ್ಲ್ಲಿ ಸರ್ವಸಾಮಾನ್ಯವಾಗಿ ಇರಬೇಕಾದ ಮತ್ತು ನಮ್ಮನ್ನು ತಾಕಬೇಕಾದ ಏನೋ ಒಂದು ಅಂಶವಿದೆಯಲ್ಲ, ಅದರ ಕುರಿತೇ ವಿವಾದವಿದ್ದರೆ ಕಷ್ಟ. ಅದು ಯಾರ ಮಧ್ಯಸ್ತಿಕೆಯೂ ಇಲ್ಲದೆ ನೇರ ಮುಟ್ಟುವಂಥದ್ದು. ತೆರೆದ ಬುದ್ಧಿಯ ದ್ವಾರದ ಮೂಲಕ ಸಲೀಸು ಪ್ರವೇಶಿಸಿ ನೇರ ಮನಸ್ಸು ತಲಪುವಂಥದು! ಅದರ ಗ್ರಹಿಕೆಯೇ ಹೋದರೆ ಅದೀಗ ಕಷ್ಟದ ಕಾಲ, ಯಾರಿಗಲ್ಲದಿದ್ದರೂ ಕವಿತೆಗೇ.
ಹಾಗಾಗಿ ಕವಿತೆ ಬೇಕಾದವರಿಗೂ ಅದು 'ಯಾಕೋ' ಬೇಕು. ಮನೆಯಲ್ಲೊಂದು ಟೂಲ್ ಬಾಕ್ಸ್ ಇದ್ದರೆ ಸಮಯಕ್ಕಾಗುತ್ತದಲ್ಲವೇ-ಹಾಗೆ. ಈ ನನ್ನ ಮಾತನ್ನು ಸಹೃದಯರು ದಯವಿಟ್ಟು ಅರ್ಧದಷ್ಟು ತಮಾಶೆ ಎಂದು ತಿಳಿದರೆ ನನ್ನ ಕ್ಷೇಮಕ್ಕೆ ಒಳಿತು.

ಈಗ ನನ್ನ ಚಿಂತೆ ಇನ್ನೂ ಹೆಚ್ಚು ಮಂದಿ ಕವಿತೆ ಓದುವಂತೆ ಮಾಡಲು ಸಾಧ್ಯವೇ ಎಂದು. ನನ್ನ ಪುಸ್ತಕಗಳಲ್ಲಿ ನನಗೆ ‘ಜೀವಯಾನ’ ಎಂಬುದು ಇಷ್ಟ. ಪುಟ್ಟದಾಗಿದೆ. ಕಡಿಮೆ ಹಣಕ್ಕೆ ಸಿಗುತ್ತದೆ. ಸುಮ್ಮನೆ ನೂರಾರು ಪುಟಗಳ ಕವಿತೆಯನ್ನು ಕವರ್ ಪೇಜು ಇತ್ಯಾದಿಯನ್ನೇ ಆಕರ್ಷಕ ಮಾಡಿ 'ಅಲಂಕಾರಾರ್ಥ'ವಾಗಿ ಅಂಗಡಿಯಲ್ಲಿಡುವ ಬದಲು, ಒಂದು ಮಸಾಲೆ ದೋಸೆಯಷ್ಟೇ ಕಾಸು, ಅಷ್ಟೇ ನಿರೀಕ್ಷೆಯಿಂದ ಒಬ್ಬ ಕೊಳ್ಳುವಂತೆ ಮಾಡುವುದು ಹೆಚ್ಚು ಅರ್ಥಪೂರ್ಣವಾದೀತು!

ಒಮ್ಮೆ ಹೊಸಪೇಟೆಯಲ್ಲಿ ಓಡಾಡುವಾಗ ಕಿರಂ ಹೇಳಿದರು-ಸಿನಿಮಾ ಹಾಡಿನ ಪುಸ್ತಕ, ಸ್ತೋತ್ರದ ಪುಸ್ತಕಗಳ ಹಾಗೆ ಬೀದಿಯಲ್ಲಿ, ಸಂತೆಯಲ್ಲಿ ಚಿಕ್ಕಾಸಿಗೆ ಮಾರಾಟವಾಗಬೇಕು ಕವಿತೆ ಎಂದು. ಹೌದೇನೋ.
ತೀರಾ ಹಾಗಲ್ಲದಿದ್ದರೂ, ನಾವೀಗ ಘನವಾಗಿ ಕವನಸಂಕಲನ ಎಂದು ಕರೆಯುವುದು ತನ್ನ ಅಹಂಕಾರದಲ್ಲಿ ವ್ಯವಕಲನಗೊಂಡು ಪುಟ್ಟ ಪುಸ್ತಿಕೆಗಳಾಗಿ ದೊರೆಯುವಂತಾಗಬೇಕು ಅನಿಸುತ್ತದೆ.
ಜೊತೆಗೆ, ಕವಿತೆಗೆ ಮುನ್ನ ಆ ಕವಿತೆ ಹೇಗೆ ಬಂತು ಎಂತಲೋ ಅಥವಾ ಅದಕ್ಕೆ ಸಂಬಂಧಿಸಿದಂತೆ ಕುತೂಹಲಕರ ವಿವರ ಗದ್ಯದಲ್ಲಿದ್ದರೆ ಓದುಗರು ಹೆಚ್ಚಾಗಬಹುದು. ಯಾಕೆಂದರೆ ಕವಿತೆ ಎಂದಾಕ್ಷಣ ಅದರ ತೆರೆದ ಬಾಗಿಲನ್ನೂ ಮುಚ್ಚಿದೆ ಎಂದು ಭ್ರಮಿಸುವ ಮಾಯೆ ಸೃಷ್ಟಿಯಾಗಿಬಿಟ್ಟ್ಟಿದೆ. ಹಾಗಾಗಿ ಅದರ ಪ್ರವೇಶಕ್ಕೆ ಕೀಲಿಗಾಗಿ ಹುಡುಕಾಟ. ಹಾಗೆ ಗದ್ಯ ವಾಕ್ಯಗಳನ್ನು ಬರೆಯುವ ಕ್ರಮ ಸರಿಯಿಲ್ಲದಿದ್ದರೂ ಈಗ ಅಗತ್ಯ ಎನಿಸುತ್ತದೆ.

ಮತ್ತು, ಸ್ವತಃ ಕವಿಗಳು ತಮ್ಮ ಕವನಗಳನ್ನು ಚೆನ್ನಾಗಿ ಓದುವುದನ್ನು ಕಲಿತು ಸಣ್ಣ ಸಣ್ಣ ಗುಂಪುಗಳಲ್ಲಿ ಅದನ್ನು ಓದುವುದೂ ಮುಖ್ಯ. ಆ ರೀತಿ ಕೆಲವೆಡೆ ನಾನು ಕವಿತೆ ಓದಿರುವುದು ನನಗೆ ಒಳ್ಳೆಯ ಅನುಭವವನ್ನೇ ನೀಡಿದೆ. ನನ್ನ ಅನುಭವದಲ್ಲಿ ನಾನು ಬೇರೊಬ್ಬರಿಗೆ ಕವಿತೆ ಓದಿದಾಗ ಅರ್ಥವಾಗಲಿಲ್ಲ ಎಂದವರು ಕಡಿಮೆ. ಬರೆಯುವಾತ ಕೇಳುವವರಿಗೆ ಕವಿತೆ ನಿನ್ನದು ಕೂಡಾ ಎಂದು ತಿಳಿಸುವಂತಿರುದು ಅವಶ್ಯ.

ಮೊನ್ನೆ ನಮ್ಮ ಮನೆಯಲ್ಲಿ ಊಟದ ಮೇಜಿನ ಮೇಲಿದ್ದ ಪ್ಲಾಸ್ಟಿಕ್ ಡಬ್ಬಿ ನೋಡಿದೆ. ಅರೆ! ಅದರ ಮೇಲೆ ಟೆನಿಸನ್‌ನ 'ಗೋಡೆ ಬಿರುಕಲ್ಲಿ ಒಂದು ಹೂ' ಎಂಬ ಪುಟ್ಟ ಪದ್ಯ ಅಚ್ಚು ಮಾಡಿದ್ದಾರೆ! ಹೆಂಡತಿ ಅನ್ನ ಬಡಿಸಿ ಸಾರು ತರುವ ತನಕವಾದರೂ ಆ ಪದ್ಯ ಓದಿದೆ. ಅವತ್ತಿನ ಮಟ್ಟಿಗಿನ ಕವಿತೆಯೋದಿನ ಪುಣ್ಯಫಲ ನನ್ನ ಅಕೌಂಟಿಗೆ ಜಮೆ ಆಯಿತು.

**
ನನ್ನ ಹೊಸ ಸಂಕಲನ ಬರುತ್ತಿರುವಾಗ ಹೀಗೆಲ್ಲ ಅನಿಸುತ್ತಿದೆ. ಮುಂದೆ ನೋಡಬೇಕು. ಇಲ್ಲದಿದ್ದರೆ ಕವಿತೆ ಒಂದು ಅತೀ ಸಣ್ಣ ವಲಯದಲ್ಲಷ್ಟೇ ಉಳಿದುಬಿಡುತ್ತದೆ-ಅಲ್ಲವೆ? ಹೊಸ ಸಂಕಲನದ ನನ್ನ ಮುಮ್ಮಾತುಗಳನ್ನು ಚುಕ್ಕುಬುಕ್ಕುನ ಓದುಗರಲ್ಲಿ ಕೆಲವರು ಇಷ್ಟಪಟ್ಟಿದ್ದಾರೆ. ಅಮೂಲ್ಯರಾದ ಅವರಿಗೆ ವಂದನೆ.

29-Jun-2015
ಚಿಂತಾಮಣಿ ಕೊಡ್ಲೆಕೆರೆ

ಈಗಿಲ್ಲದ ತಮ್ಮ ತಂದೆಯ ನೆನಪುಗಳನ್ನಾಶ್ರಯಿಸಿದ ಕೆಲವು ಪುಟ್ಟ ಪದ್ಯಗಳನ್ನು ಸೂಕ್ಷ್ಮ ಸಂವೇದನೆಯ ಕವಿ ಚಿಂತಾಮಣಿ ಕೊಡ್ಲೆಕೆರೆ ಇಲ್ಲಿ ವಾಚಿಸಿದ್ದಾರೆ. ಪದ್ಯಗಳ ಗಾಂಭೀರ್ಯಕ್ಕೆ ಅವರ ಧ್ವನಿಯ ಗಾಂಭೀರ್ಯವೂ ಬೆರೆತು ಕೇಳುವ ಸೊಗಸು ಹೆಚ್ಚಿದೆ. ಈ ಭಾವಪೂರ್ಣ ಪದ್ಯಗಳನ್ನು ಕಳಿಸಿಕೊಟ್ಟ ಕವಿಗೆ ಚುಕ್ಕುಬುಕ್ಕು ಋಣಿಯಾಗಿದೆ.

ನಮ್ಮ ಕೇಳುಅಂಕಣ ‘ಕಿವಿಸಮಯ’ದ ವೈವಿಧ್ಯತೆಗೆ ಈ ಧ್ವನಿಮುದ್ರಿಕೆ ಮತ್ತಷ್ಟನ್ನು ಸೇರಿಸಿದೆ ಅಲ್ಲವೆ?
ನಿಮ್ಮ ಅನಿಸಿಕೆಗಳನ್ನು ಸೇರಿಸಿ.

26-Jun-2015
ಚುಕ್ಕುಬುಕ್ಕು

ಮೈಸೂರಿನ ಕಲಾಸುರುಚಿ ತಂಡವು  ಇತ್ತೀಚೆಗೆ ಸಿಂಧುವಳ್ಳಿ ನೆನಪಿನ ನಾಟಕ ಸ್ಪರ್ಧೆಯೊಂದನ್ನು ನಡೆಸಿತು. ಸ್ಪರ್ಧೆಗೆ ಬಂದ ನಾಟಕಗಳನ್ನು ಓದಿ ಮೌಲ್ಯಮಾಪನ ಮಾಡಿದ ಮೂವರು ರಂಗಕರ್ಮಿಗಳಲ್ಲಿ ಕೆ ವಿ ಅಕ್ಷರ ಅವರು ಒಬ್ಬರಾಗಿದ್ದರು. ಆಯ್ಕೆಯಾದ ಐದು ನಾಟಕಗಳ ಸಂಪುಟ 'ರಂಗ ಸಿಂಧು'ವಿನ ಬಿಡುಗಡೆ ಕಾರ್ಯಕ್ರಮದಲ್ಲಿ ಅಕ್ಷರ ಆಡಿದ ಮಾತುಗಳು ಇಲ್ಲಿವೆ. ಈ ಧ್ವನಿಮುದ್ರಿಕೆಯನ್ನು ಕಳಿಸಿಕೊಟ್ಟ ಕಲಾಸುರುಚಿಯ ಶಶಿಧರ ಡೋಂಗ್ರೆಯವರಿಗೆ ಕೃತಜ್ಞತೆಗಳು.

ಹೊಸ ನಾಟಕಕಾರರ ಮುಂದಿರುವ ಸವಾಲುಗಳ ಬಗ್ಗೆ ಮಾತನಾಡುತ್ತ ಒಟ್ಟಾರೆ ಇಂದಿನ ಕನ್ನಡ ಸೃಜನಶೀಲ ಸನ್ನಿವೇಶದ  ಸಂಕಟಗಳ ಬಗ್ಗೆಯೇ ಅಕ್ಷರ ಅವರು ಇಲ್ಲಿ ಮಾತಾಡಿದ್ದಾರೆ. ಕಡೆಯಲ್ಲಿ ಹುಟ್ಟಬೇಕಾದ ಅರ್ಥಕ್ಕೆ ಲೇಖಕ ಆರಂಭದಲ್ಲೇ ದಾಸನಾಗುವ  ಅಪಾಯದ ಬಗ್ಗೆ, ಅದರಿಂದ ನಲುಗುತ್ತಿರುವ ಕೃತಿಯ ಕಲಾಶರೀರದ ಬಗ್ಗೆ, ನಾಟಕಗಳು ನಾಟಕಗಳಾಗದೆ ಸಿನಾಪ್ಸಿಸ್‌ಗಳಾಗುತ್ತಿರುವ ಬಗ್ಗೆ, ಪ್ರಾಡಕ್ಟ್‌ ಲಾಂಚ್‌ಗಳಂತೆ ಕಾಣುವ ಸುಗಂಧಪೂರಿತ ಪುಸ್ತಕ ಬಿಡುಗಡೆಗಳ ಬಗ್ಗೆ ಅವರ ಈ  ಹೊಳಹುಗಳು ನಿಮ್ಮ ಅನಿಸಿಕೆಗಳನ್ನು ಬಯಸುತ್ತಿವೆ.

08-Jun-2015
ಎಸ್‌ ಮಂಜುನಾಥ

ಸ್ವಲ್ಪ ದಿನಗಳ ನಂತರ ನಮ್ಮ ಕೇಳು ಅಂಕಣ ‘ಕಿವಿಸಮಯ’ದಲ್ಲಿ ಪದ್ಯವೊಂದನ್ನು ಕೇಳಿಸುತ್ತಿದ್ದೇವೆ. ಸೂಕ್ಷ್ಮ ಸಂವೇದಿ ಕವಿ ಎಸ್‌ ಮಂಜುನಾಥ್ ತಮ್ಮ ಹೊಚ್ಚ ಹೊಸ ಕವಿತೆಯೊಂದನ್ನು ಇಲ್ಲಿ ವಾಚಿಸಿದ್ದಾರೆ.

ಬಾಲ್ಯ ಕಳೆದ ಊರೊಂದು ಕವಿಹೃದಯದಲ್ಲಿ ಬೆಳೆಯುವ ಬೆರಗನ್ನು ಆತ್ಮೀಯವಾಗಿ ಕಣ್ಣಿಗೆ ಕಟ್ಟುವ ಈ ಕವಿತೆ, ಹಾಗೂ ಅಷ್ಟೇ ಹಿತವಾದ ಅದರ ವಾಚನ ನಿಮಗಿಷ್ಟವಾಗುತ್ತದೆ. ಬಿಟ್ಟು ಬಂದ ಊರುಗಳ ರಸ್ತೆ ಬದಿಯ ಕಲ್ಲುಗಳು ನಮ್ಮನ್ನು ಕಂಡಾಕ್ಷಣ ಎದೆ ತೆರೆದು ತೋರಲಿ ಊರ ಕೆರೆಗಳನು,  ಕಾಯಲಿ ಕಣ್ತೆರೆದು ನಮ್ಮನ್ನೆಲ್ಲ.. ಕವಿಯ ಕಾಯ್ದಂತೆ.

22-Mar-2015
ಲಕ್ಷ್ಮೀಶ ತೋಳ್ಪಾಡಿ

ಸುಳ್ಯದ ನೆಹರೂ ಸ್ಮಾರಕ ಮಹಾವಿದ್ಯಾಲಯದಲ್ಲಿ ಜನವರಿ ೧೭ರಂದು `ಕುಮಾರವ್ಯಾಸನ ಕಾವ್ಯ-ಅನುಸಂಧಾನ' ಎಂಬ ವಿಶೇಷ ಕಾರ್ಯಕ್ರಮ ನಡೆಯಿತು. ಸುಳ್ಯದ ವಾಸವಿ ಸಾಹಿತ್ಯ ಕಲಾವೇದಿಕೆ ಮತ್ತು ಕಾಲೇಜಿನ ಕನ್ನಡಸಂಘದ ಸಹಯೋಗದಲ್ಲಿ ಇಡೀ ದಿನ ನಡೆದ ಕಾರ್ಯಕ್ರಮದಲ್ಲಿ, ವಿದ್ವಾಂಸರಾದ ಲಕ್ಷ್ಮೀಶ ತೋಳ್ಪಾಡಿ, ಕವಿ ಎಚ್‌ಎಸ್‌ ವೆಂಕಟೇಶಮೂರ್ತಿ ಹಾಗೂ ರಾಜಕಾರಣಿ ವೈಎಸ್‌ವಿ ದತ್ತ ಮಾತನಾಡಿದರು.

'ಭಕ್ತನು ಕವಿಯಾದ ಬಗೆ' ಎಂಬ ವಿಷಯದ ಬಗ್ಗೆ ತೋಳ್ಪಾಡಿಯವರು ಅಂದು ಮಾಡಿದ ಅದ್ಭುತ ಉಪನ್ಯಾಸವನ್ನು ನಿಮಗಿಲ್ಲಿ ಕೇಳಿಸುತ್ತಿದ್ದೇವೆ. `ಭಕ್ತ ಕವಿಯಾದಾಗ ದೇವರು ಮನುಷ್ಯನಾಗುತ್ತಾನೆ’, ‘ಬಟ್ಟೆ ಒಣಗುವುದು ಹೇಗೆ, ಕಾವ್ಯದಿಂದ ಯಾವುದೂ ಆರ್ದ್ರವಾಗಬೇಕಲ್ಲವೆ?’ ‘ನಾನು ಆಗಲೇ ಕೊಂದವರನ್ನು ನೀನೊಂದುಬಾರಿ ಕೊಂದುಬಿಡು ಅರ್ಜುನ ಎನ್ನುವ ಕೃಷ್ಣ’ ‘ನದಿಯಲ್ಲಿ ತೇಲಿಬಿಡಲಾದ ಮಗು ಕರ್ಣ ಸಾಯುವ ಕ್ಷಣದಲ್ಲಿ ಕಡಲು ಸೇರುವಾಗ ಇರುವುದು ಈಸಿ ಜೈಸುವ ಪ್ರಶ್ನೆಯಲ್ಲ, ಧುಮುಕುವುದಷ್ಟೆ’. ತಪ್ಪದೆ ಕೇಳಬೇಕಾದ್ದು ಅಂತ ಎಷ್ಟು ಸಲ ಹೇಳಿದರೂ ಸಮಾಧಾನವಾಗದಷ್ಟು ಇಂಥ ಹೊಸ ಮಾತುಗಳು ಇದರಲ್ಲಿವೆ. ನಿಮಗೆ ಇಷ್ಟವಾದ ಅಂಶಗಳನ್ನು ಕಾಮೆಂಟಿನ ಮೂಲಕ ಚರ್ಚಿಸಿ.

ಈ ಕಾರ್ಯಕ್ರಮಕ್ಕೆ ಬೆಂಬಲವಾಗಿ ನಿಂತ ಡಾ ವೀಣಾ ಅವರು ಈ ಧ್ವನಿಮುದ್ರಿಕೆಯನ್ನು ಚುಕ್ಕುಬುಕ್ಕುಗೆ ಒದಗಿಸಿದ್ದಾರೆ. ಅವರಿಗೆ ತುಂಬು ಮನಸ್ಸಿನ ಕೃತಜ್ಞತೆಗಳು.

 

18-Mar-2015
ಸೌಮ್ಯ ಕಲ್ಯಾಣ್‌ಕರ್‌

ಕವಿತಾವಾಚನದ ನಮ್ಮ ವಿಶೇಷ ಕಾರ್ಯಕ್ರಮ ‘ಕಿವಿಸಮಯ’ಕ್ಕೆ ಬನ್ನಿ. ಈ ಬಾರಿ ಸೌಮ್ಯ ಕಲ್ಯಾಣ್‌ಕರ್‌ ರಚಿಸಿ ಓದಿದ ಎರಡು ಕವಿತೆಗಳನ್ನು ಕೇಳಿ.

ಸುಲಭವಾಗಿ ನಿದ್ದೆಹೋಗದ ಹಠಮಾರಿ ಮಗುವನ್ನು ಕುರಿತ ‘ನಿದ್ರಾಯಣ’ ಹಾಗೂ ಗೋಕುಲಾಷ್ಟಮಿಯ ದಿನ ಕಂಡ ನೂರಾರು ಪುಟ್ಟ ಪುಟ್ಟ ರಾಧೆಯರ, ಕೃಷ್ಣರ ಆಪ್ತ ಚಿತ್ರಣ ನೀಡುವ ಇನ್ನೊಂದು ಕವಿತೆಯೂ ಇಲ್ಲಿದೆ.

ಎಂದಿನಂತೆ ನಿಮ್ಮ ಅನಿಸಿಕೆಗಳಿಗೆ ಸ್ವಾಗತ.

06-Mar-2015
ಚುಕ್ಕುಬುಕ್ಕು

ಕಾಮನ ಹಬ್ಬವನ್ನು ಗಂಗಾಧರ ಚಿತ್ತಾಲರ ಈ ಎವರ್‌ಗ್ರೀನ್‌ ಪದ್ಯದ ಮೂಲಕ ಆಚರಿಸುವ ಆಲೋಚನೆ ನಮ್ಮದು. ಅದಕ್ಕೆ ತಮ್ಮ ಕಂಚಿನ ಕಂಠದಿಂದ ಮೆರುಗು ಕೊಟ್ಟವರು ಚಿತ್ರನಿರ್ದೇಶಕ ಯೋಗರಾಜ ಭಟ್‌. ಈ ದೀರ್ಘ ಪದ್ಯವನ್ನು ನಮಗಾಗಿ ಓದಿದ ಅವರಿಗೆ ಕೃತಜ್ಞತೆಗಳು. ಓದುಗರೆಲ್ಲರಿಗೂ ಹೋಳಿ ಹಬ್ಬದ ಶುಭಾಶಯಗಳನ್ನು ಕೋರುತ್ತಾ ಈ ವಿಶೇಷ ಕವಿಸಮಯಕ್ಕೆ ಸ್ವಾಗತಿಸುತ್ತೇವೆ.

ಇದನ್ನು ಕೇಳಿದ ನಂತರ ಎಚ್‌ಎಸ್‌ವಿ ವಾಚಿಸಿದ ನರಸಿಂಹಸ್ವಾಮಿಯವರ ‘ಕಾಮದಹನ’ವನ್ನೂ ಕೇಳುವ ಮನಸ್ಸಾದರೆ ಅದು ಇಲ್ಲಿದೆ.

25-Feb-2015
ಚುಕ್ಕುಬುಕ್ಕು

ಬಿ ಆರ್‌ ಲಕ್ಷ್ಮಣರಾವ್‌ ಅವರ ಹೊಚ್ಚ ಹೊಸ ಪ್ರೇಮಗೀತೆಗಳ ಧ್ವನಿಮುದ್ರಿಕೆಯಿಂದ ಆರಿಸಿದ ಒಂದು ಹಾಡು, ಈ ಬಾರಿ ಕಿವಿಸಮಯದಲ್ಲಿ. ಉಪಾಸನಾ ಮೋಹನ್‌ ಸಂಗೀತ ನಿರ್ದೇಶನದಲ್ಲಿ ಮೂಡಿ ಬಂದಿರುವ ‘‘ಯಾರಿವಳೀ ಬೆಳದಿಂಗಳು’ ಎಂಬ ಹೆಸರಿನ ಈ ಸಿಡಿ ಕಳೆದ ವಾರ ಬಿಡುಗಡೆಯಾಯಿತು. ಇಲ್ಲಿ ಬಿ ಆರ್‌ ಎಲ್‌ ಅವರ ೧೧ ಪದ್ಯಗಳನ್ನು ವಿವಿಧ ಗಾಯಕರು ಹಾಡಿದ್ದಾರೆ. ಎಂ ಡಿ ಪಲ್ಲವಿ, ಪಂಚಮ್‌ ಹಳಿಬಂಡಿ, ಮೇಘನಾ ಭಟ್‌, ವರ್ಷಾ ಸುರೇಶ್, ವಿಕಾಸ್‌ ಮತ್ತು ವಿಶ್ವಾಸ್‌ ವಸಿಷ್ಟ ಮುಂತಾದವರು ಹಾಡಿದ್ದಾರೆ. ಮಂಗಳಾ ರವಿ ಅವರು ಹಾಡಿರುವ ‘ಹಿತ್ತಲ ಬೇಲಿಯ ಕಾವಲಿನಲ್ಲಿ’ ಎಂಬ ಈ ಹಾಡನ್ನು ನಿಮಗಾಗಿ ಕೇಳಿಸುತ್ತಿದ್ದೇವೆ.  ಧನ್ಯವಾದ ಈ ಅಮ್ಮನಿಗೆ, ಹೇಳಿ ಹೋಗು ಇನಿಯನೇ, ಇವಳೇ ನನ್ನ ಕಾವ್ಯದ ಸೆಲೆ, ಹುಡುಗೀ ಏಕೀ ಮುಖವಾಡ, ಮೀಸೆ ಬಂದೋರು ಮುಂತಾದ ಪದ್ಯಗಳು ಇಲ್ಲಿ ಗೀತೆಗಳಾಗಿವೆ. 60 ರೂಪಾಯಿ ಬೆಲೆಯ ಈ ಧ್ವನಿಮುದ್ರಿಕೆ ಬೇಕಾದವರು ಈ ದೂರವಾಣಿಯನ್ನು ಸಂಪರ್ಕಿಸಿ: 9845338363

17-Feb-2015
ಶ್ರೀದೇವಿ ಕಳಸದ

ಕಿವಿಸಮಯಕ್ಕೆ ಸ್ವಾಗತ. ಬನ್ನಿ ಈ ಬಾರಿ ಶ್ರೀದೇವಿ ಕಳಸದ ಅವರ ಎರಡು ಕವಿತೆಗಳನ್ನು ಕೇಳೋಣ. ಬಣ್ಣಗುರುಡು ಹಾಗೂ ಪಲಾಶ ಎಂಬುವು ಇಲ್ಲಿನ ಎರಡು ಕವಿತೆಗಳ ಶೀರ್ಷಿಕೆಗಳು. ತಮ್ಮ ಈ ಎರಡು ಹೊಸ ಕವಿತೆಗಳನ್ನು ಭಾವಪೂರ್ಣವಾಗಿ ವಾಚಿಸಿ ಕಳಿಸಿಕೊಟ್ಟ ಶ್ರೀದೇವಿಯವರಿಗೆ ಧನ್ಯವಾದಗಳು.

ನಿಮ್ಮ ಅನಿಸಿಕೆಗಳು ಬರಲಿ.

11-Feb-2015
ಚುಕ್ಕುಬುಕ್ಕು

ನಾಳೆ, ಫೆಬ್ರವರಿ ಹನ್ನೆರಡರಂದು, ಕನ್ನಡ ಕತೆಗಾರ್ತಿ ವೈದೇಹಿ ಅವರ ಜನ್ಮ ದಿನ. ಈ ಸಂದರ್ಭದಲ್ಲಿ  ಮಣಿಪಾಲ ಯುನಿವರ್ಸಿಟಿ ಪ್ರೆಸ್ ವೈದೇಹಿ ಅವರ ಕೇಳು ಪುಸ್ತಕವೊಂದನ್ನು ಹೊರತಂದಿದೆ.  ಕವಿ ಎಚ್ಚೆಸ್ವಿಯವರ ಸಮ್ಮುಖದಲ್ಲಿ ಮಣಿಪಾಲದಲ್ಲಿ ಬಿಡುಗಡೆಯಾಗಲಿರುವ 'ವೈದೇಹಿ ಧ್ವನಿ' ಎಂಬ ಈ ಸಿಡಿಯಲ್ಲಿ ಲೇಖಕಿಯೇ ವಾಚಿಸಿದ  ಕಥೆ-ಕವನಗಳಿವೆ. ಇದರಲ್ಲಿ 'ಅಮ್ಮನ ಸೀರೆ' ಕವನವನ್ನು ನೀವಿಲ್ಲಿ ಕೇಳಬಹುದು. ಈ ಶ್ರವಣ ಪುಸ್ತಕದ ಬೆಲೆ 275 ರೂಪಾಯಿಗಳು. ಮೊದಲಿಗೆ ಟಿ ಪಿ ಅಶೋಕ ಅವರ ಪ್ರಸ್ತಾವನೆಯಿದೆ. ನೀತ ಇನಾಂದಾರ್ ಅವರ ಪರಿಕಲ್ಪನೆಯಲ್ಲಿ ಮೂಡಿ ಬಂದ ಈ ಕೇಳುಪುಸ್ತಕದ ಧ್ವನಿ ಗ್ರಹಣ ಪೀಟರ್ ಡಿಸೋಜ ಅವರದ್ದು.

ಗುಲಾಬಿ ಟಾಕೀಸ್ ಮತ್ತು ಸಣ್ಣ ಅಲೆಗಳು, ಅಕ್ಕು, ಅವಲಂಬಿತರು, ಅಮ್ಮಚ್ಚಿಯೆಂಬ ನೆನಪು ಹಾಗೂ ಕ್ರೌಂಚ ಪಕ್ಷಿಗಳು ಎಂಬ ಕಥೆಗಳೂ, ತಿಳಿದವರೇ ಕೇಳಿ, ಶಿವನ ಮೀಸುವ ಹಾಡು, ಎಲ್ಲಿ ಹೋದರೋ ಅವರು ಎಂದು ಬರುವರು, ಅಡುಗೆ ಮನೆ ಹುಡುಗಿ, ನನ್ನ ಗಂಡನ ಊರು ತೋರಿಸುವ ಬಾರೆ, ಮಗಳಿಗೆ, ಅಮ್ಮನ ಸೀರೆ ಎಂಬ ಕವನಗಳು ಈ ಸಿಡಿಯಲ್ಲಿವೆ.

ಇದೇ ಕೇಳುಪುಸ್ತಕದ ಇನ್ನೊಂದು ಪದ್ಯವನ್ನು ಕೇಳಲು ಇಲ್ಲಿ ಹೋಗಿ: `ತಿಳಿಸಾರು’

(11)
(9)